रजश्वला

भानुभक्त आचार्य-

 

आमा भन्छिन्–
“हरेक मान्छे 
रज र बीजको संयोग हो । 
बाबाको बीज र मेरोको रजबाट
तिम्रो शरीर बनेको छ । 
अर्थात् हरेक मान्छेको शरीर, 
यौवन, अंग, प्रत्यंग रज हुन् । 
तिमीलाई थाहा छ ? 
मेरा रजश्वला रोकिएर 
बनेको छ तिम्रो जीवन” 
---------------
“तिमीलाई यस धर्तीमा 
वास दिने पहिलो व्यक्ति म हुँ । 
मेरो गर्भमा नौ महिना
लजिङ, फुडिङ र अट्याच 
बाथरुमको सुविधा सहित
फाइभ स्टार होटलमा नपाइने
२४ घन्टे स्याहर सुसार 
तिमीले पायौं निःशुल्क 
तिमी गर्भमा रहुञ्जेल
मेरो रजश्वलाका हरेक थोपा 
तिमीले लिएका छौं ।” 
--------------
“तिमीलाई दुनियाँको 
सबैभन्दा पौष्टिक आहार
खुवाउने मै हुँ । 
मैले खाएर वा नखाएर
मेरो खुशीमा या दुःखमा 
रजस्वला भएको बेला
रजश्वला नभएको बेला
दश धारा दुध चौविसै घन्टा
तिमीले खाएका छौं, बेहिसाब ।” 
---------------
“आज तिमीलाई 
अलिकति संकोच छैन, 
लाज छैन, अप्ठेरो भएको छैन
मेरो लागि छाउ गोठ बनाउन ? 
मलाई रजश्वला भएको भन्दै 
घरबाट खेदाउन ? 
फेरि भन्छु, तिम्रो जीवन 
त्यही “अपवित्र” रगतको थोपा हो, 
म छाउँगोठ जाँदा तिमी कता जान्छौं, 
त्यो अपवित्र शरीर बोकेर ?”
---------------
“आज मेरो प्रतिज्ञा सुन, 
तिमीले छाउगोठका हरेक पर्खाल
नभत्काउञ्जेल सम्म 
मेरो रजश्वला बन्द गर्नेछु
धर्तीको हरेक श्रृष्टि ठप्प पार्नेछु ।
अनि तिमी त्यही छाउगोठमा
चिच्याउने छौ प्रेत बनेर 
जीवनको भीख माग्न, अर्थात्,
एक थोपा रजश्वला माग्न । 
तर त्यसबेला 
तिमीलाई गर्भावस्थादेखि
अहिलेसम्म खर्च गरेको 
मेरो रगत–पसिनाको 
एक–एक हिसाब माग्नेछु ।”

 फागुन २५, २०७३