त्रिशूली थ्री बी को खरीद बिक्री सम्झौता

आयोजनामा प्राधिकरण तथा नेपाल टेलिकमको ३०/३० प्रतिशत, रसुवा तथा नुवाकोटका गाउँपालिका र नगरपालिकाको ५ प्रतिशत, रसुवा तथा नुवाकोटका स्थानीयको वित्तिय संस्थाको ५ प्रतिशत, रसुवा तथा नुवाकोटबासीको १० प्रतिशत, सर्वसाधारणको १५ प्रतिशत र प्राधिकरण तथा टेलिकमका कर्मचारीको ५ प्रतिशत सेयर रहने छ ।

काठमाडौं, भाद्र ८ गते ।  विद्युत प्राधिकरण र नेपाल टेलिकमको मुख्य लगानीमा निर्माण हुन लागेको माथिल्लो त्रिशुली ‘थ्री बी' जलविद्युत आयोजना (३७ मेगावाट) को विद्युत खरिद बिक्री सम्झौता (पीपीए) भएको अन्नपूर्ण पोष्टमा खबर छापिएको छ । प्राधिकरण र आयोजनाको प्रवर्धक त्रिशुली जलविद्युत कम्पनीबीच मंगलबार पीपीएमा हस्ताक्षर भएको हो । प्राधिकरणका तर्फबाट कार्यकारी निर्देशक कुलमान घिसिङ र कम्पनीकातर्फबाट प्रवन्ध सञ्चालक मोहनप्रसाद गौतमले पीपीएमा हस्ताक्षर गरे।

सम्झौता अनुसार आयोजनाबाट सुख्खायाममा ( मंसिर १६ देखि जेष्ठ १५ सम्म) उत्पादन हुने १३४.८८ गिगावाट घण्टा र वर्षायाममा ( जेष्ठ १६ देखि मंसिर १५ सम्म) उत्पादन हुने १५ करोड ७७ लाख युनिट बिजुली प्राधिकरणले खरिद गर्नेछ । पीपीए दर वर्षायाम र सुख्खायाममा प्रति युनिट क्रमश : ४ रुपैयाँ ८० पैसा र ८ रुपैयाँ ४० पैसा रहेको छ ।

आयोजनाको निर्माण आगामी पुसबाट सुरु गर्ने लक्ष्य राखिएको कम्पनीका प्रबन्ध सञ्चालक गौतमले जानकारी दिए । ‘अहिले आयोजना निर्माणका लागि निर्माण व्यवसायी छनोटको काम गरिरहेका छौं', उनले भने, ‘आगामी पुसबाट काम सुरु गरी ३६ महिनाभित्रमा सक्ने लक्ष्य राखेका छौं ।' वित्तिय व्यवस्थापनका लागि नविल बैकको नेतृत्वमा सहवित्तीयकरणमार्फत लगानी गर्न प्रारम्भिक सम्झौता भएको उनले जानकारी दिए । सहवित्तीयकरणमा जलविद्युत लगानी तथा विकास कम्पनी, नागरिक लगानी कोष र नेपाल बैक रहने छन् ।

आयोजनामा प्राधिकरण तथा नेपाल टेलिकमको ३०/३० प्रतिशत, रसुवा तथा नुवाकोटका गाउँपालिका र नगरपालिकाको ५ प्रतिशत, रसुवा तथा नुवाकोटका स्थानीयको वित्तिय संस्थाको ५ प्रतिशत, रसुवा तथा नुवाकोटबासीको १० प्रतिशत, सर्वसाधारणको १५ प्रतिशत र प्राधिकरण तथा टेलिकमका कर्मचारीको ५ प्रतिशत सेयर रहने छ ।

नुवाकोट र रसुवामा निर्माण हुने आयोजनामा प्राधिकरणले अहिले निर्माण गरिरहेको ६० मेगावाटको माथिल्लो त्रिसुली थ्री ए को क्यास्केड आयोजना हो ।